KULTURSALONG - Kjartan Fløgstad og Steinar Raknes

Kjartan Fløgstad og Steinar Raknes

Forfattar Kjartan Fløgstad kjem til Kultursalong med bassist Steinar Raknes, og saman spelar dei i Kjartan Fløgstad band. Jan H. Landro skal leie samtalen med Kjartan Fløgstad.

Fløgstad er ein av dei verkeleg store i norsk litteratur. Han har fått nesten alle dei litterære prisane det er mogleg å få, med unntak av Nobelprisen. Allereie i 1978 fekk han Nordisk råds litteraturpris for romanen Dalen Portland, og i 2008 vart han tildelt Brages heiderspris. Mest kjend er han for romanane sine, men han debuterte som lyrikar. Fleire av romanane hans har òg mange innslag av prosalyrikk som ein del av teksten. Mange av desse brukar han når han opptrer saman med jazzmusikarar.

Fløgstad blandar språk frå ulike stilnivå, leikar med ordspel og alluderer til andre tekstar og til filmar. Dette fungerer særs godt saman med musikk. Etter at han no har fylt 80 år, er han meir vital og aktiv enn nokon gong før – i alle fall når det gjeld framføringar av eigne tekstar i samarbeid med ulike musikarar.

Kjartan Fløgstad si siste bok «Kniving i katedralen» blir historia om Stavangers barokke handverkskunst avdekt. Kven utforma preikestol og minnetavler i Stavanger domkyrkje? Stemmer historia som Alexander Kielland og hans kumpanar fortalde kvarandre – om at æra skal tilskrivast ein av slekta sine forfedrar? Kan ny museumsforsking, basert på skriftlege kjelder, verktøyspor og handverkskunnskap, snu opp ned på etablerte sanningar?

NB: Eit av kapitla heiter Flatfyll på Karmøy!

Steinar Raknes er ein av Noregs fremste jazzbassistar og har samarbeidd med ei rekkje sentrale jazzmusikarar og kulturarbeidarar. Han er òg vokalist og låtskrivar. Raknes er medlem i Tord Gustavsen Trio, og dei siste åra har han òg hatt fleire konsertar saman med mellom andre Unni Wilhelmsen.

Kjartan Fløgstad har og Steinar Raknes spelar saman i Kjartan Fløgstad band, og vil mellom anna spela frå verket «Due og drone».

Kultursalong er støtta av Kulturdirektoratet og gjennomførast i samarbeid med Karmøy folkebibliotek og Karmøy Dialekt- og mållag.